 UNICEF-i ka botuar raportin mbi Përparimin për Fëmijët i cili tregon se përparimi i bërë në uljen e vdekshmërisë së fëmijëve është shumë i ngadalshëm, megjithëse ka mënyra me kosto të ulëta për ta bërë një gjë të tillë. Në vitin 2002, viti i fundit për të cilin ka statistika bashkëkohore, raporti thotë se një në çdo 12 fëmijë në mbarë botën vdes para se të mbushë 5 vjeç.
Ky është një përmirësim krahasuar me vitet 1960 kur 1 në çdo 5 fëmijë vdiste. Megjithatë kjo shifër përfaqëson 11 milionë vdekje në vit, shumica e të cilave mund të parandalohen. Në vendet e industrializuara, çdo vit 7 në çdo 1 mijë fëmijë vdesin nën moshën 5 vjeçare, krahasuar me 158 për çdo 1 mijë fëmijë që vdesin në vendet në zhvillim. Mjerisht, numri i vdekshmërisë së fëmijëve po rritet në vend që të pakësohet edhe në disa vende të Evropës Lindore dhe Qendrore.
UNICEF-i thotë se kujdesi i pakët shëndetësor për nënat dhe mungesa e mamive të kualifikuara gjatë lindjeve janë faktorët që mund të përmirësohen për të parandaluar vdekjet. Në raport thuhet se sëmundjet parazite dhe infektive si fruthi dhe malaria janë ndër shkaktarët kryesor të vdekshmërisë.
Ka shembuj që tregojnë se marrja e vitaminave A mund të shpëtojë mbi 25 mijë jetë njerëzish në vit ashtu si edhe terapitë kundër dehidratimit që mund të parandalojnë 1 milionë vdekje. Programet e vaksinimit mund të mbrojnë jetët e gati 4 milionë fëmijëve.
Burimi: OKB: ulja e vdekshmërisë tek fëmijët- ende e pamjaftueshme/ZA
| 
